Өлеңдер ✍️

Қабірі қайда Шəмшінің, білесіңдер ме?
Басына барып, бата оқып жүресіңдер ме?
Отыр ма əлде қасында қарақұс қалғып,
Жатыр ма əлде көміліп күресіндерге?
Қабірі қайда Шəмшінің, білесіндер ме?
«Кеңсайды» көзге, жұртым-ау, ілесіңдер ме?
Құрдымға қашқан судайын жоғалып, өшіп,
Жоқ, əлде оған барар жол түгесілген бе?
Қабірі қайда Шəмшінің, білесіңдер ме?
Басына шыбық барғанда тігесіңдер ме?
Жұмақтың жұмсақ жұпарын жататын бүркіп
Жанына əсем не жетсін гүл өсіргенге!
Қабірі қайда Шəмшінің, білесіңдер ме?
Тірлігі барда кім бүкпес тізесін жерге...
Қамыңды жаса, бауырым, қадірің барда,
Қашанғы қалт-құлт күн кешіп жүресің жерде.
Қабірі қайда Шəмшінің, іздедіңдер ме,
Үйде жүргенде ұмытпай, түзде жүргенде?
«Кеңсайға» Шəмші кеткелі ұқсаймыз біздер
Ұзаққа құсын ұзатқан күздегі көлге...