Өлеңдер ✍️

Димаш аға, әз аға,
Наз айта келдім алдыңа.
Етпеңіз айып бөлмеуге
Уақытыңызды амал қалды ма!
Өнерін өлең ұстаған
Бірімін қазақ қызының.
Үркердей ғана шоғырмыз,
Не дейін санап тізімін.
Еңбегім де бар, талап көп,
Өз ортам кезге ілмейді.
Қыздарын мендей өзге елдің
Ерекше талант, гүл дейді.
Әлемге әйгі Зульфия,
Армянның және Сильвасы.
Қазақтың сонда қызы ма
Саналар кемге сый басы.
Отыздай кітап шығарып,
Туған ел жырын толғадым.
Өз ортамнан әрі асып
Танылар бірақ болмадым.
Москвадан бес жинақ
Талпынып жүріп шығардым.
Етті-ау деп енбек бағалап,
Қадірін мұның ұғар кім!
Оқыған адам жырымды
Жазыпсың жаман демейді.
Намысын қуып қазақтың
Қызын өзге кім елейді!
Радиола ән салып,
Есігін қақтым аспанның.
Тамсандырып үлкенді,
Аузында жүрмін жастардың.
Зейін салып зерттедім,
Ілияс, Қасым жырларын.
Дәреже алдым докторлық
Ақтарып, ашып сырларын.
Ренжи көрме әз аға,
Мақтанға сайып сөзімді.
Сарылып еткен еңбегім —
Тұқырта жегіп төзімді.
Маңдайдан терді сыпырдым,
Бәрінің тартып бейнетін.
Іздесем, аға, айып па
Бейнеттің аздап зейнетін.