Өлеңдер ✍️

Қазақтың ақ киелі ұғымыңда
Мәні оның — мағынаның тұнығында.
Пәктіктің періштедей баламасы
Тотықпас, мәңгі тозбас ғұмырында.
Не таза адал аққа баланады
Айғағы ақиқаттық саналады.
Жақсылық атаулының жоралғысы
Ар-намыс таразысы санадағы.
Киелі ақ сүт дейміз ана сүтін
Парызын мойындатып бермей ме үкім.
Қадірлеу ақ сақалды, ақ басты ию
Рәсімін күп алады дүние бүтін.
Көңілің, жан, жүрегің адал сезім —
Бағыштап аққа ниет еткен кезің
Киелі мағынаға болады ие
Әрқашан ақты жалғап айтқан сөзің.
Бұл мағына өзгермейді тұрсаң барлап,
Айтыла бермейді тек әркімге арнап...
Ақ жанды, адал халық қазақ жұрты
Деген сөз кетті тарап әлем шарлап.
Көк аспан құбылмалы көп елге ортақ
Аққа жақ Алла өзі берген жол сап
Қазақтың ақ көңіліне бағышталып
Туының түсі шіркін һәм болса ақ.
Жасаған ақтан туын Абылай хан
Бар оның негізінде ғажайып мән.
Алланың ақ жолы деп тұспал еткен
Ниетке тәнті қазақ елі оған нан.
Жөнделеп ту жасапты көгілдірден
Көргенде елең етті көңіл бірден.
Жөн еді-ау қазақ туын ақтан жасап,
Ақ үйдің төбесінен төгілдірген.