Әңгімелер ✍️

Бір күні Қожанасыр үйінде отырса, біреу есік қағады.

— Не керек саған? — деп дауыстайды Қожа.

— Төменге түсіп кетіңіз, — деген аянышты үн естіледі. Қожа төменге түссе, келіп тұрған қайыршы екен.

— Құдайы садақа беріңіз, — дейді.

Қожа жатып ашуланады, бірақ онысын қайыршыға сездірмей:

— Жоғары көтеріл, — деп өзі жоғары шығып кетеді.

Қайыршы байғұс қуанып, Қожаға еріп, жоғары көтеріледі, Қожа отырған бөлмеге келеді.

Қожа енді түсін суытып:

— Садақасын Құдайдың өзі береді, бар, — дейді.

— Мұның қалай, пақыр адамды неге тәлкек етесің? — деп қайыршы ренжиді. — Құр қол қайтаратыныңды төменде тұрғанда-ақ неге айтпадың?

Сонда Қожа:

— Мен жоғарыда тұрғанда, шаруаңды бірден айтпай, мені неге төменге түсірдің? — депті.