Өлеңдер ✍️

Жайнаған не ер белден,
Тасыған ба ақ Жайық?
Ну телегей тербелген,
Қыры қандай ғажайып!
Кеме жүзген үстінде,
Кереметті айдын кең,—
Самолеттен түстім де,
Құшағымды жайдым мен.
Тұрғандай-ақ алтыннан,
Шұғыласын жайып күн.
Дән екен бұл шалқыған,
Жазығында Жайықтың.
Чапаевтай аттанып,
Жеңіспенен оралған
Әскер ме бұл топталған,
Қырға шапқан Оралдан?
Көріп соны алыстан,
Құшағымды жайыппын.
Мотор мініп жарысқан,
Ұлдары екен Жайықтың.
Сол моторға күй бітіп,
Күймелермен ағылған.
Жұлдыздар ма құйғытып,
Жалтылдаған сағымнан?
Жүгіріп мен алдынан,
Құшағымды жайыппын.
Астық екен ағылған,
Толқынындай Жайықтың.
Қарадым мен қалып таң,
Дүркін дәнге тасыған.
Тасып сонау Жайықтан,
Миллиардқа қосылған.