Өлеңдер ✍️

Эскалатор барады алып төменге,
Эскалатор барады алып тереңге,
Миллион аяқ—миллион орман көшкендей
Барады ағып, барады ағып төбемде.
Эскалатор ұқсап қызыл сұңқарға,
Эскалатор барады алып шырқауға.
Миллион көздер — миллион жұлдыз
жанады,
Арман атты асқаралы бір тауда.
Келем, келем со бір тауға мен өрлеп,
Жан-жағыма көз тастаймын елеңдеп.
Тебірентіп тереңдік пен биіктік,
Бір сәт өзім кеткендеймін тереңдеп.
Тереңдікпен жаңа шықтым табысып,
Биіктікпен тұрмын енді қауышып.
Тебірентіп тереңдік пен биіктік,
Егіз жолдай жетектейді жарысып.