Өлеңдер ✍️

Сәтім, сірә, тұйығыңа қамалған.
Алу, қосу — әйтеуір бір амалдан
«Екі» алдым да,
Бар шындықты жасырмай
Айтамын деп,
Таяқ жедім анамнан!
Бір туғаннан қалай ғана табам мән?!
Мықтап тұрып жұлқылатып жағамнан.
Өтірігін айтамын деп бетіне
Оңашада таяқ жедім ағамнан!
Өмір деген от екен ғой өршіген,
От пен судың арасында тершігем.
Айтып қойып істеген бір ұрлығын
Тағы бірде таяқ жедім көршіден.
Тама-тама жанардан жас,
Бастан қан,
Талай-талай дымқыл жастық жастанғам.
Міне, солай
Менің қоңыр ғұмырым
Шындық үшін
Таяқ жеуден басталған!