Өлеңдер ✍️

Алқызыл гүл,

Көгілдір гүл,

Аппақ гүл...

Оған қолын жеткізе алмас аптап қыр.

Ніл-дария толқынында толықсып,

Үлбірейді құпиясын сақтап бір...

Күн пішіндес бір ғана гүл әр түсті,

Алқызылы – таңғы араймен шарпысты,

Көгілдірі – аспан гүлі, мысалы,

Рух кейпі – ақ лотос, қар түсті...

Лотос гүлі...

Мысыр ғашық, Ніл ғашық,

Ніл менен Гүл жұп жазбайды сырласып.

Ай туғанда ұйқы қымтап қауызын,

Шырайланар шын болмысын Күнге ашып...

Ніл үстінде жүзер кешке Күн күрең,

Не айтады оған құм-жағалау мүлгіген...

Гүл ұмтылар Күнге қарай...тамыры

Жібермейді...

су түбіне сүңгіген...