Өлеңдер ✍️

Жолдастар!
Құтты мына сәт
Қуаныш толған қойынға,
Жалауда жайнап болашақ
Ұлы октябрь тойында,
Сенімен, досым, қара, әне
Жарыңмен, сәби балаңмен
Адымдап бірге барады
Қозғалып Миллиард алаңмен!
Миллиард елдің өз аты,
Миллиард бізбен замандас,
Еңбектің, істің озаты,
Қолыңды соз да, амандас!
Қанатын қақты құс-алаң
Ал қызыл алып тулармен,
Ұрандар әнге ұқсаған,
Дүрілдеп дүрмек думанмен,
Келеді әне шат халық,
Керемет бақыт, жеңіспен.
Алдыңғы қатар аттанып,
Артынша лек-лек келіскен.
Құйылып мынау ел-толқын
Қуаныш атты мұхитқа,
Екпінмен есіп бір жойқын
Шығыпты қайнап жұрт сыртқа.
Шалқымай қайтсын ел бүгін
Мерейі үстем шақта бұл,
Көрсетті ғажап ерлігін
Елу тоғызыншы Октябрь!
Миллиард және жүз сексен
Миллион деген сан мынау,
Ырысын елдің сол шешкен,
Тарихи самғау — бұл самғау!
Туған жер — Қазақстаным,
Октябрь күнгі сәлемің
Дабысы осы ұшқан күн,
Аспанында әлемнің!
Не деген мынау бақытты
Павлодар туған трактор,
Келеді сүйреп уақытты,
Маңдайында Миллиард тұр!
Дүрілде, жаңғыр, зор алаң,
Салтанатпенен сап өткіз,
Өркенде, ер жет, жаңадан
Қаһарман ұл мен өжет қыз!
Мінекей жайнап басты алға,
Жетпіс алтыншы жылғы батырлар
Есімін жазып аспанға
Салюттар көкте шатырлар.
Астықтың исі аңқыған
Ардагерлерменен таныстық,
Маңдайлар жіпсіп балқыған
Қойнында қос-қос нан ыстық!
Сары алтын масақ желбіреп
Келеді күнмен нұр қосып,
Бойынан маржан мөлдіреп
Келеді дала, қыр көшіп.
Ғаламат алып Республика
Сығылып сыймай алаңға,
Қаптайды шығып бу сыртқа,
Еседі лебі саған да,
Қуаныш атты көгершін
Сартылдап ұшып кеудеден,
Астана қала төбесін
Қалықтап қанат сермеген!
Күмбір де күмбір күй мен ән,
Күмістер жолға шашылған,
Ақындар асқақ жырлаған.
Арқаға сәби асылған,
Трибуна мынау — мың саусақ
Дамылсыз тұрған қозғалып,
Жан-жағын биік ту қоршап,
Ауаны ұран, сөз жарып.
Пай-пай ғажап салтанат,
Шайқалып мынау дүбірмен,
Қолтыққа байлап қос қанат,
Алаңнан сөйлеп тұрмын мен.
Ақынға бұдан, сірә да.
Бақыт та артық бола ма!
Миллиард туған бұл дала
Айтады алғыс қоғамға,
Айтады алғыс Лениннің
Партиясына данышпан.
Бақытын ашқан жерімнің,
Асырған атын ғарыштан!
Сәлем де сәлем — мың сәлем,
Москва, ардақ Кремльге!
Әперген аброй мұнша кең
Советтің байтақ ұлы еліне!
Октябрь қанат қағады
Жарысып бүгінгі адаммен,
Қуаныш жүрек жарады,
Жаңғырып көңіл жаңа әнмен.
Жазылып тарих тарауы
Басында қызыл жалаумен,
Миллиард өтіп барады
Алматыдағы алаңмен.