Өлеңдер ✍️

Әжені сағыну

Терең ойдың құшағына малынып,
Қасиетті жыр-тұмарды тағынып,
Сезім билеп сансыраған санамды,
Отырмын мен ақ әжемді сағынып.

«Әжесінің құлыншағы – сұлтаным,
Табаныңа кірген тас пен қылтаның
Маңдайыма шөңге болып кірсін», -деп,
Алақанда әлдилеген ұрпағын.

Немерелер қаз-қатар боп тізіле,
Көлеңкедей ілесуші ек ізіне.
Соқпақ жолдар әжімдерін әрлеген,
Ақ әжемнің күрең тартқан жүзіне.

Дидарына тәкаппарлық, паңдық тән,
Әсем үні заман өте қарлыққан.
Ақ әжемді сағынғанда жаулығын
Иіскеймін тауып алып сандықтан.