Өлеңдер ✍️

Өшпес деме алаулап жанған көмір,

Өте шығар зымырап жалған өмір.

Ажалменен бетпе-бет жолыққанда,

Қандай күйді кешесің, қайран көңіл?!

Кім туса да өлуге жаратылған,

Құтылмайды ажалдың аранынан.

“Ғазиз жаның - аманат”,- депті Иассауи,

Мейлі патша, ғалым бол дара тұлғаң.

Түспеу үшін тозақтың азабына,

Ораза мен намазды қаза қылма.

Жарылқасаң кем-кетік, жетімдерді,

Жолығасың жұмақтың ғажабына.

Тәуба айтсаң кетеді қашып қайғы,

Үмметтерін Мұхаммет жасытпайды.

Жақсы-жаман әр ісің Тәңірге аян,

Таразылар, иншалла, асықпайды.

Құран ғана мұратқа жеткізеді,

Имандылық ғибадат еткізеді.

Жаббар Ием мұбәрәк аяттары

Ізгілікті санаңа сепкізеді.

Адал құлдың Аллаға махаббаты-

Әділдігі, рақымы, қанағаты.

Үялатсаң үшеуін жүрегіңе,

Тиері хақ Раббыңның шапағаты!..