Өлеңдер ✍️

Ленинге ұлы нұрдайын
Жыр арнап оның дидарын
Тіл жеткенше сыйпаттап
Құяйын өлең балдайын,
Бірге туған Ленинмен,
Тұңғыйық теңіз түбінен
Сүзіп бір алған інжудей
Сөз асылын таңдайын,
Көсемім көркем келбетің
Арайлап атқан таңдайын.
Көзің шолпан жұлдыздай,
Жиһаннан биік маңдайың,
Жүрекке жылы, көзге ыстық
Туған алтын айдайын.
Көз алдымда тұлғаң тұр
Биік бір зеңгір таудайын.
Халықты нұрың қарық қып,
Қараңғыны жарық қып,
Жарқырап жанған шамдайын.
Сен туғанша әлемге
Күн туды ма көгінен?
Сен туғанша әлемге
Туды ма ай көк төрінен?
Сен туғанша әлемге
Гүл жарды ма жерінен?
Сен туғанша біздің ел
Арылды ма шерінен?
Сен туғанша кетті ме
Бұлт асқар тау белінен?
Асыл Ленин сондықтан
Сен нұрлысың күннен де,
Асыл Ленин сондықтан
Сен нұрлысың айдан да,
Тарихтың ұлы алыбы
Сен биіксін таудан да,
Халыққа қанат қаққызған,
Әлемге таң атқызған,
Сен жарықсың таңнан да,
Жалыннан күшті бір отсың,
Күннен де күшті қуатсың
Туған бір біздің жалғанда!
Мавзолейді мен көрдім,
Тоқсаннан асқан жасымда,
Құшақтап қана сүйгендей
Тұрдым біраз басыңда.
Езу тартып, көз жұмып,
Жатысыңа жан ұйып,
Балқытқандай келбетің
Таудың қара тасын да.
Нақ өзіндей пішінде,
Қырандайын күшінде,
Орындап берген ұлы антын
Кремльдің ішінде,
Сталин тұр қасында.
Партия атын жоғары
Таза қылып ұстағын,
Деп еді Ленин, ұлы антын
Орындады Сталин!
Көздің қарашығындай
Бірлікті құрыш ұстағын,
Деп еді Ленин, ұлы антын
Орындады Сталин!
Пролетар диктатурасын
Нығайтып таза ұстағын,
Деп еді Ленин, ұлы антын
Орындады Сталин!
Жұмысшы-Шаруа одағын
Нығайтып таза ұстағын.