Эсселер ✍️

               Әлеуметтік жұмыс мамандығы

   Әлеуметтік жұмыс – бұл жай ғана мамандық емес, ол қоғамдағы маңызды мәселелерді шешуге бағытталған үлкен жауапкершілік пен адамгершілікті талап ететін сала. Бұл салада жұмыс істейтіндер адамның жан-дүниесіне үңіліп, оның жағдайын жақсартуға күш салады. Қазіргі заманда әлеуметтік жұмысшылар қоғамдағы ең қажетті мамандардың біріне айналды, өйткені олардың қызметі адамның өмір сапасын арттыруға, қиын жағдайдан шығуына көмектесуге бағытталған.

  Әлеуметтік жұмысшы – бұл қиын жағдайға тап болған адамдарға көмек көрсететін маман. Олар әртүрлі мәселелермен айналысады: тұрмыстық зорлық-зомбылық, мүгедектігі бар адамдардың жағдайы, аз қамтылған отбасылардың мәселелері, жасөспірімдердің құқықтары, қарт адамдарды қолдау және т.б. Әлеуметтік жұмысшының ең басты міндеті – қиын жағдайға тап болған адамның жанынан табылып, оны қолдау. Бұл қолдау тек материалдық көмек көрсету емес, сонымен қатар моральдық қолдау болып табылады. Мысалы, жалғызбасты қарт адам үшін әлеуметтік жұмысшы оның өміріндегі ең жақын адамға айналуы мүмкін. Ол қарттың жағдайын түсініп, онымен сөйлесіп, күнделікті өмірдегі қажеттіліктерін қамтамасыз етеді. Бұл қарапайым көрінгенімен, адамның өміріне үлкен өзгеріс әкелуі мүмкін.

  Әлеуметтік жұмысшы – қоғамдағы әділеттілікті сақтаушы. Ол тек жеке адамдарға көмек көрсетіп қана қоймай, жүйелік мәселелерді шешуге де атсалысады. Мысалы, балалардың құқығын қорғау, мүгедектігі бар адамдарға тең мүмкіндіктер жасау, әйелдерге қарсы зорлық-зомбылықты азайту – мұның бәрі әлеуметтік жұмысшылардың күнделікті қызметіне кіреді.

  Әлеуметтік әділеттілік – бұл қоғамның барлық мүшелеріне тең мүмкіндіктер жасау. Бірақ оны жүзеге асыру оңай емес. Әлеуметтік жұмысшы әр адамның жеке қажеттілігін ескере отырып, оған лайықты көмек көрсетуі керек. Бұл үлкен сабырлық пен кәсіби шеберлікті қажет етеді.

 Әлеуметтік жұмысшы болу – бұл мамандықты таңдаудан бөлек, ішкі құндылықтарды түсінуді білдіреді. Бұл салада жұмыс істеу үшін мейірімділік, адамға деген махаббат, жауапкершілік және жанашырлық қажет. Қоғамдағы осал топтарға көмектесу – тек кәсіби міндет қана емес, сонымен бірге адамдық парыз.Әлеуметтік жұмысшының жұмысы көбіне көрінбейді, бірақ оның нәтижелері әр адамның өмірінде терең із қалдырады. Біреуге көмек көрсету арқылы қоғамдағы үлкен өзгерістерге себепкер болу – осы мамандықтың ең үлкен мақсаты.

Қорытындылай келсек, әлеуметтік жұмыс – бұл адамдардың өмірін жақсартуға бағытталған ерекше мамандық. Бұл салада жұмыс істеуәркімнің қолынан келмейді, өйткені ол терең білімді, сабырлылықты және мейірімді жүректі талап етеді. Әлеуметтік жұмысшылар – қоғамның тірегі, олар өз еңбегі арқылы әлеуметтік әділеттілікті қамтамасыз етіп, адамдардың өмірін жеңілдетеді. Қазіргі заманда бұл сала тек көмекті қажет ететін адамдарға ғана емес, бүкіл қоғамға қажет. 

                                            Орындаған:Сарсенгалиев Мейрамбек Маратұды

                                            Тексерген: Сарыбаева Индира Сарыбайқызы