Өлеңдер ✍️

Қараша түні

Қанатында қаздардың,

Қаралы жыр маздар мұң.

Жатырқайды-ау тірлікті,

Жалғыз күні жалғанның.

Ызыңынан қурайдың,

Ызалы күй тыңдаймын.

Құстай ұшып қуаныш,

Құтырынар қу қайғым.

Күзгі моншақ мөлдір мұң,

Сезімімді семдірдің.

Шашасынан от шашқан,

Оралмайды-ау өндір күн.

Қызғылт шапақ шұбалып,

Күн батады қызарып.

Күнге қарап құбылам,

Жүз семіріп, жүз арып.

Құба құмның қияғы,

Безілдейді жиі әне.

Безіп кеткен бебеу үн,

Берен ақын қиялы.

Көкжал бөрі түн жүріп,

Құмығады қырда ұлып.

Түн түнегін тіледі,

Жанарында нұрлы үміт.

Сәби арман шетінеп,

Сыздап құрғыр көкірек.

Атар ма еді сызып таң,

Шымылдық түн сетінеп.