Тақпақтар ✍️

Бізге көрші тұратын,
Ақкөңіл бір ағай бар.
Аты оның Рақым,
Мақтайды оны талайлар.
Мақтайды оны атам да,
Мақтайды оны мамам да.
Мақтайды оны папам да,
Ұнайды аға маған да.
* * *
Ел үшін ғой, түсінем,
Орады ағай көп егін.
Аямайды кісіден
Қолдан келген көмегін.
Жасап берді ол бір күні
Бізге ойыншық комбайн.
 Көрген кезде жұрт мұны,
Бір-бір қақты таңдайын.
Баурап алды ол енді,
Бізді еңбекке құмар ғып.
Шекер, Қыпшақ, Төленді
Барлығымыз қуандық.
* * *
Ойыншықты құрытпай,
Ойнап жүрдік біз күліп,
Ағайды да үмытпай,
Ойлап жүрдік ізгілік.
Балық аулап бар бала
Жиналыстық түсте нақ.
Алып бардық ағаға,
Балық сорпа істеп ап.
Көлеңкеге ол келді де,
Бізбен асты бір ішті.
Сонан соң:
Хош, –
Деді де,
Қайта іске кірісті.
* * *
Осы ағай күніге,
Комбайннан түспейді.
Кешке келіп үйіне,
Және жүмыс істейді.
Сынса жүрттың сағаты,
Бүзылса егер өтегі,
Таусылғандай тағаты,
Тез ағайға жетеді.
Жөндейді ағай, сүртеді.
Бір сәт тыным таппайды.
Сондықтан ба жүрт оны
Қолы епті, – деп мақтайды.
* * *
Тағы да таң атады,
Алтын арай шашылып.
Ағай бара жатады,
Жұмысына асығып.
Кездессе бір кісіге,
Сәлем бермей өтпейді.
Оған үлкен, кіші де,
Рақмет көп, – дейді.
* * *
Бір күні ол қалаға
– Оқимын, – деп аттанды.
Содан бері ағаға
Бораттық біз хаттарды.
Хатыма да ол менің,
Талай жауап қайтарды.
Ізгі іс болсын еңбегің
– Жақсы оқы, –
деп айтады.
Енді ағай келмекші,
Демалысқа ауылға.
Кімдер не сый бермекші
Сағынысқан бауырға.
Шекербек пен Төленді
Жүмыртқалар жинап жүр.
Не істеймін мен енді,
Осы ой мүлдем қинап жүр.
 Өртенгенде кенеттен,
Түтін қаптап үй-ішін
Алып шыққам мен өрттен
Төлендінің інісін.
Күнде-күнде кешкісін,
Көрші әжейге келемін.
Сауғызамын ешкісін,
Отын жарып беремін.
Суда жүзіп жарыссақ,
Озамын бар баладан.
Қөмектессем ағаға ұқсап,
Ырза боп жүр бар адам.
Осы сыйдың бәрі де
Қуандырар ағаны.
Келгеннен соң, әрине,
Арқамнан ол қағады.