Өлеңдер ✍️

«...Көп екен ғой бұл өмірде жалғандық,

Біреулерді аласың да арман қып,

Күйдім дейсің,

Сүйдім дейсің езеуреп,

Бәрі соның қолдан жасап алғандық» –

Дейсіңдер-ау,

Дейсіңдер-ау, ағайын,

Мен де соған нанайын ба, нанайын!

Бірақ, бірақ айтыңдаршы, дегіштер,

Жүрегіме қандай дауа табайын?!

Дегіштер-ай,

Дейсіңдер-ау үндеме,

Ойды, сірә, қамап ұстар кім, неге?!

Жақыныңды тыңдай қоя ма бұл жүрек,

Ақылыңды тыңдай қоя ма бұл неме?!