Өлеңдер ✍️

Ата-анаң кім, туысқан кім,

Сұрап алған, қарттарым-ай!

Жақын тартып, ұғысқан күн

Жылап алған, қарттарым-ай!

Кешке жақын үй алдында

Қауқылдасқан қарттарым-ай.

Жетегінде қиялдың да

Мауқын басқан қарттарым-ай.

Сәлем берсең «Ассалау» деп,

Риза болған қарттарым-ай.

Аспандатып тастады-ау деп,

Мырза болған қарттарым-ай.

Болмаса да дәм-тұзда ойың,

Жайнататын қарттарым-ай.

Іздеп барсаң,

Жалғыз қойын

Жайрататын қарттарым-ай.

Аулақ небір сасық ойдан,

Өмірі – арман қарттарым-ай.

Бір-ақ атым насыбайдан

Көңілі қалған қарттарым-ай.

Дүниені шайқаған бұл

Дана, қорған қарттарым-ай.

Қартайғанда қайтадан бір

Бала болған қарттарым-ай.

Оңай жанып-сөнуі де,

Бәрін көрген қарттарым-ай.

Сенің өсіп-өнуіңе

Жанын берген қарттарым-ай!