Өлеңдер ✍️

Белі анамның бүгілді,

Айтты ақылын аналық:

Кеудемдегі күнімді

Баспасын деп қара бұлт.

Табаны әке тілінді,

Барын берді қолдағы:

Көңілдегі күнімді

Қорғасыннан қорғады.

Ұстартты ұстаз тілімді,

Қол бұлғады бір арман.

Кеудемдегі күнімді

Аршып алды тұманнан.

Сол күнімнің жарығы

Тұрды өмірді сәнді ғып.

Ол – жауынгер қабірі

Басындағы от мәңгілік!

Сен кедергі бол, мейлі,

Ей, сәттерім, қамыққан!

Күнім мәңгі сөнбейді

Қуат алған халықтан!

Сәулесін сен көрдің бе,

Қарашы ақыл-санамен.

Көңілдегі сол күнге

Жылынып тұр бар әлем!