Өлеңдер ✍️

Күндерім аз тоқпейіл, толқытпаған,

Толқытпаған күндерден қорқып қалам.

Жыл құсым боп, ұшырар жыр-құсым боп,

Келіп-кетіп тұрады бақыт маған.

Келіп-кетіп тұрады маған да Бақ,

Аялаймын әрқашан адал қарап.

Бақыт деймін кей күнді шаттандырған,

Бақыт деймін кей күнді саған балап.

Келіп-кетіп тұрады Бақ маған да,

Кездері бар кейде іздеп таппаған да...

Бақыт өбіп, сыйпайды мандайымнан

Сені, жаным, таныстар мақтағанда!

Ғұмыр деген қып-қысқа жолда мына,

Не жетеді от басың-орманыңа!

Қиялдағы Бақыт боп жарытпайды,

Қарайықшы Бақыт деп қолдағыға!..