Өлеңдер ✍️

Қазақта бұрын бар әдет –

Шақырмай бардым аға деп.

Жүрген соң әрі өзіңіз

«Келмейсің үйге, бала!»  деп.

Жігітпін деуші ем ағалы,

«Ағасы барлар жағалы!»

Болды ғой жаным жаралы,

Жанарың өтіп барады.

Сезгенім – қалдың жақтырмай,

Сөздерің сыбап, сабады.

Емес қой, аға, қарынды

Толтырудың бір амалы.

Табылады ғой қайдан да

Орыстың жаман арағы.

Бұзыла бастағаны ма

Қазақылықтың қамалы?!

«Адамды байлық бұзады-ау» ... –

Сананы ойлар қамады.

Еркелететін ағаны

Бұл күнде кімдер табады?!

Ырысыңды ішіп кетпеймін,

Ыдысың да үйде қалады!..