Өлеңдер ✍️

Аңғалдау, өткен күндер-ай,

Алдан да күткен күндер-ай.

Асудан асуға асырып,

Арманға жеткен күндер-ай.

Алтыннан әрман күндер-ай,

Алқымнан алған күндер-ай.

Алдымнан қайта шығар ма

Артымда қалған күндер-ай.

Алдаған, түлкі – күндер-ай,

Арбаған, күлкі – күндер-ай.

Қуаныш, арман, бақытпен

Жалғаған, шіркін, күндер-ай.

Жылаған мәнсіз күндер-ай,

Құлаған сәнсіз күндер-ай.

Қырықтан асқан жасымды

Құраған сансыз күндер-ай.

Ұнаған мұңым күндер-ай,

Құраған жырым – күндер-ай.

Не бітірдім бұл жаста

Сұраған бүгін күндер-ай.

Тулаған тұлпар күндер-ай.

Зулаған сұңқар күндер-ай.

Жетер ме едім мен саған

Тумаған іңкәр күндер-ай...