Өлеңдер ✍️

Алғаш рет ауылдан

Алысқа ұзап барамын –

Мен деп жаны ауырған

Жанарынан ананың,

Аясынан атаның,

Саясынан ағаның,

Бетке ап таңның шапағын –

Саған қарай,

Жаңа күн!

Кері зулап келе ме,

Доңғалағы арбаның?

Ауылға ұзай бере ме,

Алға ұзамай арманым?!

Алаңдадым соңыма;

«Оң болсын, – деп, – сапарың»,

Қарап қалды-ау жолыма

Інілерім,

Қатарым...

Лүп-лүп жүрек соғады

Қап барады бүлдіршін.

Көп қой,

Ұзақ жол әрі,

Алдағыны кім білсін...

Көз алдымда түр-өңі

Шуағындай даланың...

Бала екен ғой жүрегі –

Ақ тілекті ананың!