Өлеңдер ✍️

Біздің үйде кей керемет байдың жоғы,

Біздің үйде жарқ еткен жайдың да оғы.

Тереземнен енеді түнде келіп,

Біздің үйге тіреліп Айдың жолы.

Біздің үйде гауһар да, сом алтын да,

Олар үшін болам хан, болам құл да!

Падишах та, патша да, сұлтан да бар,

Көтереді мені ертең солар шыңға!

Шаштарынан иіске, иіс қандай!

Үндерінен ән шалқып, күй ұшқандай!

Олар жоқта ортаяр көңіл шіркін,

Олар барда біздің үй пейіш қандай!

Олар барда сәтім жоқ серпілмейтін,

Соларда жүр мінезім, көркім, кейпім.

Солар мені жылытар, жұбатар да,

Солар мені өлсем де өлтірмейтін!