Өлеңдер ✍️

Шақырады ақ шаңқан өнер шыңы,

Жеткізбейді ол жай бір өлеңшіні.

Бейбіт өмір жырыма арқау болса,

Өлеңдерім – елімнің көгершіні!

Өлең – құсым мөп-мөлдір қонды айдынға,

Қалықтамас тосқауыл болмай мұңға.

Шарықтамас шабыт ап шамырқанбай,

Өзіне тән үні бар торғайдың да!

Ақын санап менен сыр, жыр күткендер,

Биікке ұшса өлеңім – бүркіт деңдер.

Сұлу болса – аққудың көгілдірі ол,

Қондырыңдар айдынға, үркітпеңдер!

Қондырыңдар, жоқ өзге тілек менде,

Самғағанға жанашыр  – тірек кем бе?

Ұшырамын кеудемнен өлең – құсты,

Ұяласын шыңдарға, жүректерге!