Өлеңдер ✍️

Араласып Адаммен бір жүр еңдер,

Үміт, Сенім, Мейірім, жүнжімеңдер!

Аспандашы, Арманым – ақиығым,

Жасқанбашы, сендерді кім жүгендер?!

Көргенім жоқ кісіні ой кісендеген,

Ізгіліктің сендерсіз ісі өнбеген!

Қолға қалам ұстар ма үмітсіз жан,

Мейірімсіз қағазға түсер ме өлең?!

Жақсы – Жаман қашаннан жүр егесте,

Жауапты біз –

Болашақ жүдеп өссе!

Күретамыр достыққа сендерсіңдер,

Өздеріңсіз дүние тұл емес пе?!

Бір-біріне Тіршілік жанын ашып,

Сендер барда болмай ма бәрі ғашық!

Ара-жігі ашылып туыстардың,

Шын сүйгендер кетпесін ажырасып!

Көгершін боп ұшыңдар алаңдарда,

Ойнаңдаршы от болып жанарларда!

Сүрінгенде сүйейтін сендерсіңдер,

Сендерсіңдер жетелер Адамды алға!

Бір-біріңмен едіңдер көптен көрші,

Өткен де ерсі, сендерсіз көктем де ерсі!

Жаралғаннан жанымыз бір емес пе,

Адамдардан алшақтап кетпеңдерші!