Өлеңдер ✍️

Мен де жеттім,

іздеп мені жел жетті,

Туған өлке қарсы алмады нем кетті.

Шилі өзені тебірене теңселіп,

Тарпаң ұлын толқынында тербетті.

Туған жер-ай,

Ұлын көріп толқыды,

Сол баяғы жота-жоны, жол құмы.

Бірін- бірі қоштап,

                            қолдап, қайталап,

Судың, құмның үдей түсті толқыны.

Толқын ойда,

Толқын өзен жарында,

Қол бұлғайды тербетіліп сағым да.

Қойдың піскен таңдайындай жағалау,

Толқып- тасып отқа оранды жаным да.

Құйқылжыған төгіп аспан тұрса күй,

Жастар, қарттар, мәз боп, әне, жүр сәби.

Қаладағы көп қабатты үйлердей

Өзен жары- мың сан отау, мың сан үй.

Құлағыма әкелсе үнін толқындар,

Көз алдымда, жаным, сенің шолпың бар.

Қабаттардан қарлығаштар ұшырып,

Мен келді деп салды әлемге сол күн жар.

Туған жер-ай!!!

Туған жерсіз қайда бақ?!

Сенсіз қонған маңдайға бақ- тайғанақ!

Ай сәулесі тереземнен түсті де,

Түні бойы шықты мені аймалап!