Әбу Насыр Әл-Фараби

Аристотельден кейін əлем бойынша білім мен мəдениеттің Екінші ұстазы атанған ұлы данышпан, ғұлама ғалым, энциклопедист Əбу Насыр əл-Фараби жалпы түркі ойшылдарының ең атақтысы, ең мəшһүрі. Мұсылманша толық аты-жөні Мұхаммед ибн Мұхаммед ибн Узлағ Тархани. Ерте заманда түркі халықтарының орталығы болған Отырар қаласында, Сыр бойында дүниеге келген (арабтар Отырарды «Фараб» деп атаған).
Əлемге əйгілі ойшыл, философ, математик, физик, астроном, лингвист, музыка зерттеушісі əл-Фараби 150-ден астам трактат жазып қалдырған. Тарихи деректердің айтуынша, жетпіске жуық тіл білген.
Əл-Фарабидің философиялық ұстанымдары мен көзқарастарынан басты үш бағытты анық аңғаруға болады. Ғұлама ғалым дүниенің мəңгілігін мойындап, танымның болмысқа тəуелділігін растаған, ақыл-парасат туралы ілімге талдау жасап, сарапқа салған.