Ш.Мұртаза «Тәуекел той» әңгімесі. Қазақ әдебиеті, 10 сынып, қосымша материал. 7 сабақ.

Жұлдызды нұрлы суреткер

Жұмабек С.

 Еліміз тәуелсіздігі жылдарында Шерхан ағамыздың қаламынан «Соғыстың соңғы жесірі», «Тәуекел той», «Алапар мен Динго», «Шыршаның жыры», «Бұршақ»,«Жарамазан», «Мыңбұлақ», «Тұз кесел», «Нахал торғайлар», «Бабаның оралуы», «Сарыала қаз - Феникс», «Шағалалар мен қаңғыбастар», «Теке бұрқақ», «Жалғыз», «Тарпаң» тәрізді классикалық әңгімелер мен новеллалар туды.

 Осынау әңгімелер мен новеллалардың кейіпкерлері - адамдардың, сонымен қатар үй хайуанаттарының, аң-құстардың, түз тағыларының, қысқасы осынау тіршілік әлеміндегі әралуан жан-жануарлардың аллегориялық сипаттағы іс-әрекеттері мейлінше шыншылдығымен, қысқа да нұсқа шымыр қайырымдарымен, ішкі жан-дүниеңді шаншып-шаншып алатын өткірлігімен, кейде ашынтып, кейде сүйсінтіп жіберетін көркем жинақтауларымен баурап алатыны бар. Жер бетіндегі ең қымбат тіршіліктің мәні - бес күн жалғанның әлеуметтік-қоғамдық - имандық-адамгершілік тұтастығының табиғи жарасымына қол жеткізуге, - төрт құбылаңды түгендеуге деген күрескерліктің күн тәртібінен ешқашан түспейтіндігіне көзіңді жеткізе түседі. .

 Қазіргі өтпелі кезеңдегі қоғам мен әлеумет өмірінің көлеңкелі жақтарының көркемдік философиясы мен көркемдік психологиясы хас шебердің қолынан шыққандығын дәлел келтіріп жатудың өзі ерсі сияқты. Суреткердің қазіргі таңдағы осы туындыларын республикалық баспасөз беттерінен оқыған әрбір оқырманның бұған кәміл көз жеткізгенін әр түрлі орталардағы пікір алысу әсерлерінен-ақ байқауға әбден болады. Мұның қай-қайсысы болмасын, біздің бүгінгі тіршілігіміздің әлеуметтік-адамгершілік өткір мәселелеріне назар аудартуымен, терең ойландырумен қапысыз тәшін етеді. Нағыз хас шебердің қолтаңбасына сүйсіндіре түсетін көркемдік қарапайым сиқырымен-ақ құдіретті әрі жауһар әңгімелер болып табылады.