«Денсаулық – зор байлық». Дені саудың -жаны сау. Қазақ тілі, 7 сынып, дидактикалық материал. 9 сабақ.

Денсаулық туралы мақал-мәтелдер

Денсаулық — ең басты байлық екенін бәріміз де жақсы білеміз. Назарларыңызға бір топ денсаулық туралы мақал-мәтелдерді ұсынамыз.1. Еңбектен асқан ем жоқ.2. Қуып ішкенің — қақалғаның, Ажалыңа тақалғаның. 3. Ертеңгі асты тастама, Кешкі асқа қарама. 4. Жалқаулық — жаман ауру. 5. Тазалық — саулық негізі, Саулық — байлық негізі. 6. Жұғын бар жерде — шыбын бар, Шыбын бар жерде — шығын бар. 7. Дос-жаран ауырып қалғанда, Елемей селсоқ жүрерсің. Әлекке ауру салғанда, Қадірін жанның білерсің. 8. Екі ауру бір келсе, Ажалыңның жеткені. 9. Дәрігер дәрімен емдемейді, Тілмен емдейді. 10. Қимыл шынықтырады, Ұйқы тынықтырады. 11. Қомағай болдым дегенше, Қорадан шықпай өлдім де. 12. Ауырып, ем іздегенше, Ауырмайтын жол ізде. 13. Жан ауырса, тән азады, Қайғы басса, жан азады.

Абыз «Аталы сөз»

Ата-ананың қадірін,

Балалы болғанда білерсің.

Ағайынның қадірін,

Жалалы болғанда білерсің.

Балалықтың қадірін,

Саналы болғанда білерсің.

Асыл менен жасықты,

Бағалы болғанда білерсің.

Бостандықтың қадірін,

Жабылғанда білерсің.

Қалтаңдағы ақшаны,

Қағылғанда білерсің.

Денсаулықтың қадірін,

Ауырғанда білерсің.

Ақ бетіңнің қадірін,

Қан кеткенде білерсің.

Ақ білектің қадірін,

Әл кеткенде білерсің.

Жиырма бестің қадірін,

Жас өткенде білерсің.

Қара көздің қадірін,

Нұр кеткенде білерсің.

Татулықтың қадірін,

Дос кеткенде білерсің.

Аяқ қолдың қадірін,

Ақсағанда білерсің.

Отыз тістің қадірін,

Қақсағанда білерсің.

Қызыл тілдің қадірін,

Тоқтағанда білерсің.

Білгеніңді сөйлеп қал.

Білгендерден ғибрат ал!