Семирамида аспалы бағы . Қазақ тілі, 6 сынып, сабақ жоспары. 2 сабақ.

Ұзақ мерзімді жоспардың бөлімі:

Әлемнің жеті кереметі

Мектеп: Орал қаласындағы ФМБ НЗМ

Күні:

Мұғалімнің ТАӘ:

Жакыпжанова А.С

Сынып: 6

Қатыспағандар саны:

Қатысқандар саны :

Сабақтың тақырыбы

Семирамида аспалы бағы

Осы сабақ арқылы іске асатын оқу мақсаттары (оқу бағдарламасына сілтеме)

6.1.5.1. тыңдалған мәтін мазмұны бойынша жалпы және нақты сұрақтарға жауап беру, мәтіндегі ақпаратты шынайы өмірмен байланыстыру.

Сабақтың мақсаты

Оқушылар:

• Тыңдалым мәтінінің мазмұнын түсінеді;
• жалпы және нақты сұрақтарға жауап береді;
• тыңдалымдағы ақпаратты өз өмірімен байланыстырып, пікір білдіреді.

 Бағалау критерийлері

• Мәтіннің тақырыбы мен идеясын анықтай алады;
• тыңдалым мәтіні бойынша дұрыс жауапты тауып белгілейді;
• саябақты сипаттап, пікір білдіреді.

 Тілдік мақсаттар

Пән лексикасы және терминология:

Тыңдалым мен айтылымға қажетті сөз тіркестері:

аспанмен таласқан, көздің жауын алады, жасыл желекті, тұрғындарды таң-тамаша қалдырады, хош иісті гүлдер, жердегі жұмақ.

 Құндылықтар

Құрмет, өмір бойы оқу.

 Пәнаралық байланыс

География, тарих

Осыған дейін меңгерілген білім

«Қазақстандағы көрікті жерлер», «Ұлттық және отбасылық құндылықтар» бөлімдері арқылы оқушылардың тыңдалым дағдылары дамытылды.

Сабақтың барысы

Жоспарланған әрекеттер

1-тапсырма.

«Ғажайып бақ» тапсырмасы.

Мұғалім оқушыларға талқылау сұрақтарын қояды.

• Баққа барып, серуендеп көрдіңіз бе?
• Сіз тұратын мекенде бақ (саябақ) бар ма?
• Адамдарға бақ не үшін қажет?

Оқушылар сыныпта еркін қозғалып, осы сұрақтарды бір-бірімен талқылайды.

2-тапсырма.

Талқылап болған соң мұғалім ғажайып бақ қандай болу керек деген сұрақ қояды. Оқушылар осы сұраққа ойланып, шағын топта бірге топтастыруды толтырып, ғажайып бақтың қандай болатыны туралы өз ойларын жазады.

Жазып болған соң,өз идеяларымен бөліседі.

Кейін мұғалім бүгінгі сабақтың тақырыбын таныстырады.

Сабақта жүзеге асатын оқу мақсаты, бағалау критерийлерін мұғалім оқушылармен бірге талқылайды.

Тыңдалым алдындағы тапсырма.

Мұғалім тақтадан Семирамида аспалы бағының суретін көрсетеді. Оқушыларға осы ғажайып бақ туралы не білетіндіктерін сұрайды.

Арнайы тілдік оралымдарды ұсынады. Оқушылар ұсынылған тілдік оралымдарды пайдаланып, суреттегі жеті кереметтің бірі – Семирамида бағын ауызша суреттеп береді.

Қолдануға болатын тіркестер: аспанмен таласқан, көздің жауын алады, жасыл желекті, тұрғындарды таң-тамаша қалдырады, хош иісті гүлдер, жердегі жұмақ.

Дескриптор:

• Суретті сипаттап береді;
• ұсынылған тілдік оралымдарды тиімді қолданады;
• өз ойын анық, сауатты жеткізе алады.

Тыңдалым тапсырмасы.

Мұғалім оқушыларды тыңдалымға дайындайды. Ол үшін оқушыларға тыңдалым бойынша сұрақтарды ұсынады. Оқушылар мәтінді тыңдамас бұрын сұрақтарды оқып, танысып шығады. Кейін мұғалім тыңдалым аудиосын қосады немесе дауыстап оқып береді. Оқушылар мәтінді тыңдап отырып, дұрыс жауапты белгілейді.

Мәтінді тыңдап, дұрыс жауапты белгілеңіз.

• Мәтін тақырыбын табыңыз

А) Вавилондағы ғажайып бақ

Ә) Әлемнің жеті кереметі

Б) Навуходоносор II атты Вавилон патшасы

2. Мәтіннің идеясын анықтаңыз.

А) Семирамида аспалы бағын Мысыр пирамидасымен салыстыру

Ә) Семирамида аспалы бағы, оның тарихы туралы ақпарат беру

Б) Семирамида аспалы бағының конструкциясын таныстыру

3. Аспалы бақ Вавилонда қай жерде салынған?

А) патша сарайының ауласында тұрғызылған

Ә) Вавилон қаласының кіре берісінде тұрғызылған

Б) патша сарайының сыртында тұрғызылған

4. Қосымша ақпаратты анықтаңыз.

А) Навуходоносор Аспалы бақты әйелі үшін тұрғызды.

Ә) Аспалы бақ Навуходоносор ІІ-нің бұйрығымен тұрғызылды

Б) Вавилония елінің ауа райы ыстық, шөлейт.

5. Аспалы бақтың болғанына қандай дәлел бар?

А) Археологиялық қазбалар кезінде табылған конструкциялы құрылыстар

Ә) Көне жазбалардан табылған суреттер мен деректер

Б) Археологиялық қазбалар кезінде табылған жеміс ағаштарының қалдықтары

6. Навуходоносор патша Аспалы бақты не үшін салғызды?

А) Атағын әлемге әйгілі етіп, мықтылығын жариялау үшін

Ә) Өз елін аңсап жүрген әйелін жұбату үшін салғызған

Б) Халықтың серуендеп, демалуы үшін салғызған

7. Мәтінде жоқ ақпаратты табыңыз

А) Аспалы бақтың құрылысы

Ә) Аспалы бақтың салыну тарихы

Б) Аспалы бақта болған атақты тұлғалар

8. Өлер алдында Аспалы баққа апаруын бұйырған кім?

А) Александр Македонский

Ә) Навуходоносор патша

Б) Амитис патшайым

Дескриптор:

• мәтіннің тақырыбы мен идеясын анықтай алады;
• тыңдалым мәтіні бойынша дұрыс жауапты тауып белгілейді.

Өзін-өзі бағалау:

Тапсырманы орындап болған соң, мұғалім дұрыс жауапты оқушыларға көрсетеді. Оқушылар өзін-өзі бағалайды, қанша сұраққа дұрыс жауап бергендері туралы, қандай сұраққа жауап беру қиындық туғызғаны туралы кері байланыс береді.

Тыңдалымнан кейінгі тапсырма.

«Кубизм» әдісі арқылы оқушылар өздері барып көрген бір бақты/саябақты жан-жақты қарастырады.

Мұғалім алдымен оқушыларды алты топқа бөледі.

Топқа бөлуде түрлі-түсті қима қағаздарды пайдалануға болады.

Алты түсті түс арқылы оқушыларды топқа бөледі. Топқа бөліп, оқушыларды отырғызғаннан кейін мұғалім кубикті лақтырып, әр топқа алты түрлі тапсырма ұсынады.

Оқушылар шағын топта бірлесе өзіне ұсынылған тапсырманы орындайды.

• СИПАТТАҢЫЗ: Өзің барып көрген бір бақты (саябақ) сипаттаңыз
  • Қайда орналасқан?
  • Қандай өсімдіктер өседі?
  • Көлемі қандай?
  • Несімен ерекшеленеді?
  • Серуендеушілерді не қызықтырады?
• СУРЕТТЕҢІЗ: Сол бақтың суретін салыңыз және суретті түсіндіріңіз
• САЛЫСТЫРЫҢЫЗ: Бақты Аспалы бақпен салыстырыңыз.
• ҚОЛДАНЫҢЫЗ: Өзің көрген бақ туралы төрт жол өлең шығарыңыз
• ДӘЛЕЛДЕҢІЗ: Бақтардың адамзатқа керек екендігіне дәлел келтіріп, пікір білдіріңіз.
• ЗЕРТТЕҢІЗ: Сен білетін баққа адамдарды көбірек тарту үшін не істеу керек деп ойлайсыз? Бірнеше идея ұсынып көріңіз.

Дескриптор

• Өзі көрген бақты сипаттап бере алады;
• бақтың суретін салып, түсіндіреді;
• аспалы бақпен салыстырады;
• төрт жол өлең шығарады;
• дәлелді пікір білдіреді;
• мәселені шешудің жолдарын көрсетіп, идея ұсынады.

Сабақтың соңында мұғалім бағалау критерийлері мен сабақ мақсаттарына қайта оралады. Бағалау критерийлеріне қаншалықты қол жеткізгендері туралы бірге талқылайды.

Рефлексия.

«Бес саусақ» әдісі. Оқушылар параққа қолын айналдыра сызып алады да әр саусаққа ұсынылған сұрақтардың жауабын жазады.

Дифференциация – Сіз оқушыларға көбірек қолдау көрсету үшін не істейсіз? Қабілеті жоғары оқушыларға қандай тапсырма беруді көздеп отырсыз?

Бағалау – Оқушылардың ақпаратты қаншалықты меңгергенін қалай тексересіз?

Пәнаралық байланыс

Қауіпсіздік ережелері

АКТ-мен байланыс Құндылықтармен байланыс (тәрбиелік элемент)

Жалпы баға

Сәтті өткен екі нәрсені атап көрсетіңіз (сабақ беру және оқытуға қатысты)?

1:

2:

Қандай екі нәрсе сабақтың одан да жақсы өтуіне ықпалын тигізер еді (сабақ беру және оқытуға қатысты)?

1:

2:

Осы сабақ барысында сынып немесе жеке оқушылар туралы менің келесі сабағыма дайындалу үшін қажет болуы мүмкін қандай ақпарат алдым?