Жексеннің мектептегі бір күні. Қазақ тілі (орыс сыныбы), 5 сынып, дидактикалық материал.

Жексеннің желімі Жексенді сыныптастары да, мектептегі басқа оқушылар да «Тәртіпсіз Жексен» деп атайды. Шынында да солай. Сабақта тыныш отырмайды,жан- жағындағыларға үнемі кедергі жасайды. Жазады, сызады, жыртады. Әбден болмаса, қағаздан ұшақ жасап, мұғалиманың көзін ала бере, ұшырып жібереді. Сағыз да шайнайтын сол. Қасындағы Зағипаға күн бермейді. Түртеді, мазақ етеді. Еңбек сабағы болатын. Оқушылар қағаз қиып, гүл жасауға кірісті. Тек Жексен жан-жағына жалтақтап, бостан-бос отыр. Өйткені оның қайшысы да, желімі де жоқ... Бір кезде мұғалима апай қарсы алдындағы Айдарды тақтаға шақырды. Осы мезетті пайдаланып, Жексен оның партасының отырғышына желім төгіп қойды. Жабысып қалып, күлкі болсын дегені. - Жексен, кәне, жасаған гүліңді көрсетші, - деді апай осы кезде. - Жасаған жоқпын, - деді бұл. - Апай, оның желімі, қайшысы жоқ, - деді Зағипа. - Айдарда бәрі бар екен. Соның орнына отырып жасай ғой, - деді апай. – Ал Айдар сенің орныңда отыра тұрсын. Жексеннің жүрегі су етті. Әйтсе де амал жоқ, сездірмеуге тырысты.Отырды... Сабақ бітті. Оқушылар у-шу болып, сыртқа шықты.Сыныпта Жексен ғана жалғыз қалды. Орнынан ептеп тұрып көріп еді, тұра алмады. Шалбары отырғышқа жабысып қалыпты. 

(«Балдырған» журналынан.)

1.Мәтіннен тірек сөздерді табыңыз.

2.Мәтінге жай жоспар құрыңыз.

Тәртіпсіз , мазақ , жалтақтап, мезет, желім, төгіп, жабысты, қылық, кедергі, сызады, жыртады, түртеді, мазақ етеді.