Қазақстан Республикасының Мемлекеттік Елтаңбасы. Қазақ тілі (орыс сыныбы), 4 сынып, дидактикалық материал.

Қазақстан Республикасының Мемлекеттік Елтаңбасы.

Егеменді Қазақстанның Елтаңбасы 1992 жылы ресми түрде қабылданды. Оның авторлары – белгілі сәулетшілер Жандарбек Мәлібеков пен Шот-Аман Уәлиханов.

Қазақстан Республикасының Мемлекеттік елтаңбасы дөңгелек. Мемлекеттік елтаңбаның орталық элементі –шаңырақ бейнесі. Шаңырақты айнала күн сәулесі секілді тараған уықтар шаншылған. Шаңырақтың оң жағы мен сол жағына аңыздардағы қанатты пырақтар бейнесі орналастырылған. Жоғарғы бөлігінде – көлемді бес бұрышты жұлдыз, ал төменгі бөлігінде «Қазақстан» деген жазу бар. Шаңырақ – елімізді мекендейтін барлық халықтардың ортақ қонысының символы.

Қанатты тұлпар бейнесі батылдықты, сенімділікті және ерік күшін танытады.

Бес бұрышты жұлдыз символы Қазақстан тұрғындарының жүрегі мен құшағы бес құрлықтың өкілдері үшін қашанда ашық екенін білдіреді.

Елтаңбада қолданылған негізгі түс – алтынның түсі. Бұл – байлықтың, әділдіктің және кеңпейілділіктің символы.