Мынау қай жануардың мүсіні? (1). Қазақ тілі (орыс сыныбы), 3 сынып, дидактикалық материал.

МҰҒАЛІМГЕ АРНАЛҒАН НҰСҚАУЛЫҚ

3-сынып (оқулық: «Қазақ тілі», «Көкжиек» баспасы)

4-тарау

Сәулет өнері

6-сабақ

Мынау қай жануардың мүсіні?

Бұл сабақта оқу мақсаттарына сәйкес оқушылардың айтылым дағдысын шыңдау көзделеді.

Оқушылардың барлығы: Үлгі бойынша әр мүсінді сипаттап айтады.

Оқушылардың көпшілігі: Шеңбер бойымен әңгімелеу барысында маған/саған/сізге/оған септелген есімдіктерді орынды қолданады.

Оқушылардың кейбірі: Тірек сөздерді қолданып, «Шығыс күнтізбесі» субұрқағын сипаттап айтады.

Мұғалімнің сабақалды дайындығы: (дидактикалық материалдарды қараңыз)

Мына ресурстарды дидактикалық материалдардан оқушылар/топтар санына қарай көбейтіп алыңыз:

• «Мозаика» әдісін қолданып, топтарға бөлу үшін және оқушылар назарын сабаққа шоғырландыру үшін берілген 3 суретті А4 формтты қағаздарға шығарып алыңыз (бір данадан 3 парақ). Әр суретті бірнеше қиындыларға бөліп қиыңыз. Қиындыларды жақсылап араластырып алыңыз. АКТ қолдану мүмкін болған жағдайда №1 слайдты қолданыңыз;
• №2 слайдта берілген суретті кластерді әр топқа 1 дана болатындай етіп шығарып алыңыз;
• Грамматикалық кестені әр топқа 2-3-тен таратуға болатындай етіп шығарып алыңыз;
• Тақтаға №5 слайдта берілген кестені іліңіз немесе интербелсенді тақта мүмкіндіктерін пайдаланыңыз;
• «Шығыс күнтізбесі» субұрқағының суреті мен тірек сөздер және дескриптор жазылған қағаздарды дидактикалық материалдар жинағынан шығарып алаыңыз;
• «Стикерлі вагондар» плакаты мен стикерлерді дайындап алыңыз.

Мұғалімнің сабақ барысындағы әрекеті:

• Оқушыларды көтеріңкі көңіл-күймен қарсы алыңыз. Оқу құралдарын парталарға қойған соң шеңбер бойымен тұрғызып, «Мозаика» тәсілі арқылы топтарға біріктіріңіз. Әр топқа өз суреті бойынша 1-2 сөйлем айтуды тапсырыңыз (№1 слайд).
• №2 слайдты ашып, қысқа мерзімді жоспарда берілген сұрақтарға жауап алыңыз. Сабақтың тақырыбын болжатып көріңіз және тақырыпты жариялаңыз.
• Сабақ мақсаттары мен бағалау критерийлерін бірлесе отырып құрыңыз (№3 слайд).

Грамматикалық терминдерді қолданбай, жіктеу есімдіктерінің барыс септігіндегі қолданысын меңгертіңіз (№4 слайд). Үлгіні көрсетіп, өзін тексеруді тапсырыңыз.

(1-тапсырма - №5 слайд) Тақтада алдын ала дайындаған кесте мен үлгі тұрады. Мұғалім оқушылар назарын оқулықта берілген мүсіндерге (суреттерге) аударады.

Тақтадағы үлгімен танысады:

ҮЛГІ: Маған жылқының мүсіні ұнайды. Жылқының мүсінінің түсі – қоңыр.

• Әр оқушы өз атын және өзіне ұнайтын мүсіннің атауын кестеге жазады да, үлгі бойынша сипаттап айтады.
• Бағалау «Шапалақ» тәсілі арқылы жүзеге асырылады.

2-тапсырманы орындау барысында тақтадағы (1-тапсырма барысында толтырған кестесін) кестеге назарын аударыңыз. Тапсырманың орындалу ретімен таныстырыңыз. №6 слайдты қолданыңыз.

№7 слайдта берілген сурет пен тірек сөздермен таныстырыңыз және тапсырманы орындау жолымен, регламентпен таныстырыңыз. Топтарға мәтінді дайындауға 5 минут, топтық жұмысты қорғауға 2 минуттан берілетінін ескертіңіз. Топтық жұмыстарды қорғау кезінде дескриптор арқылы өзін өзі бағалау немесе топаралық бағалауды қолданыңыз.

Рефлексия жүргізу үшін №8 слайдты ашыңыз немесе «Стикерлі вагондар» плакатын қолданыңыз. Оқушылар таратып берген стикерлерге өз атын жазып, сәйкес вагонға жапсырады. 2-3-вагондарға жапсырылған стикер иелерінен осылай бағалау себебін сұраңыз, мәселені шешудің жолын сыныптастарымен бірге қарастырыңыз.

Үй тапсырмасын орындаудың жолдарын түсіндіріңіз (№9 слайд).

Құрметті әріптес! Сіздің оқушыларыңыздың тілді меңгеруін қызықты әрі жеңіл ету үшін, сізге әріптестік көмек көрсету үшін әрқашан СМК порталынан қажетті ресурстарды ала алатыныңызға сенімдімін! Іске сәт!