Өсімдік және жануар жасушасы. Биология, 7 сынып, дидактикалық материал.

 Өсімдік және жануар жасушалары

 Жасуша - тірі ағзалардың құрылымының ең қарапайым бөлігі, құрылысы мен тіршілігінің негізі. Жеке тіршілік ете алатын қарапайым тірі жүйе.

 Жасушаның құрылымдық бөліктері

 Ядро – жасушаның тіршілігін басқарады. Жасушаның көбеюіне қатысады. Генетикалық ақпарат орналасқан. Саңырауқұлақтар, өсімдіктер және жануарлардың жасушаларында ядро болады.

 Мембрана жасушаның ішіне қажетті заттарды оңай өткізіп, зиянды заттарды өткізбейді.

 Мембрана арқылы жасуша қоршаған ортамен байланыс жасайды. Әр түрлі заттар тек жасушаның ішіне ғана өтпей, көршілес жасушаларға да өтеді. Қатар жатқан екі жасушаның цитоплазмалары саңылау арқылы бір-біріне өтеді.

 Цитоплазма - жасушаның ішін толтырып тұратын сұйықтық. Жасуша мен сыртқы орта арасында жүретін зат алмасуды қамтамасыз ететін жасушаның қажетті бөлімі. Цитоплазма жасушаның ішінде үздіксіз қозғалыста болады.

 Хлоропласт – тек өсімдік жасушасында болады. Жасыл түс береді. Күн энергиясын сіңіріп, фотосинтез үдерісіне қатысады. Фотосинтез кезінде органикалық заттар түзіледі.

 Нағыз вакуоль - тек қана өсімдіктерде болатын органоид. Вакуоль іші сұйықтыққа толы болады.

 Жасуша қабырғасы целлюлоза деп аталын күрделі көмірсудан тұратын өсімдік жасушасының мембрана сыртынан қаптайтын қалың қорғаныш қабаты. Жасуша қабырғасы өсімдік жасушасына қалыпты пішін береді.