Шығармадағы оқиғаны болжау «Ерекше сурет» Жәди Шәкенұлы. Әдебиеттік оқу, 3 сынып, дидактикалық материал.

ҚОСЫМША 1

Ерекше сурет

 Ерлан ойланып отыр. Қаламын тістелей береді. Кеше мұғалім: «Бейбітшілік тақырыбына сурет салып келіңдер», – деген. Балалар қуана келіскен. Тек Ерлан ғана іштей қатты қиналды. Өйткені ол сурет салуға олақ.

 Ерлан терезеден сыртқа көз салды. Бұдан басқалар қаннен-қаперсіз ойнап жүр. Әне, Марат пен Сәбит допқа таласып, шу-шу етеді. Ерланның делебесі қозса да, орнынан қозғалған жоқ. Қайтсе де суретті салып бітіруі керек. Көзін тарс жұмып, құлағын басты. Даладағы у-шуды естігісі де, көргісі де келмейді.

 Қағаздың дәл ортасына кептердің суретін салды. Оның астына алып шарды орналастырды. Енді не істесе екен? «Бұл аз», – деді Ерлан ішінен. Кептері ұқсаңқырамайды. Шары да сопақтау сияқты. Жыртып тастады. Қайта салды. Тағы жыртты.

 Уақыт жылжып барады. Сыртқа тағы қарады. Балалар ойыны қыза түсіпті. Ду-думан... .

 Көрші бөлмеден шешесінің ыңылдап әндеткені естілді. Бесікте жатқан інісі Асқар оянған болуы керек.

 Ерланның қуаныштан көздері жайнап кетті. «Болды!» – деді ішінен. – «Таптым!» Тездетіп ойындағысын бейнелеуге кірісті...

 Ертеңіне мектепке келді. Балалар жиналып қалыпты.

 – Менің суретім жақсы, менікі жақсы, – деп, балалар әрқайсысы салған суретін көрсетіп мақтанып жатыр екен.

 Ерлан үндеген жоқ. Суретін ешкімге көрсетпеді. «Балалар мазақтап жүрер», – деп қысылды.

 Қоңырау соғылды. Мұғалім кірді. Парталарды жағалап, суреттерді көре бастады. Кезек Ерланға келді.

 – Балалар, – деді мұғалім. – Бәріңнің салған суреттерің біркелкі екен. Ал Ерланның суреті ешкімге ұқсамайды. Көрдіңдер ме, ол нағыз бейбіт өмірді бейнелеген. Мынау, міне ..., ... .

 Ерлан өзін ерекше қуанышты сезінді.

 Жәди Шәкенұлы

ҚОСЫМША 2

ҚОСЫМША 3

ҚОСЫМША 4

ҚОСЫМША 5