Ел бірлігі – ел бақыты (5 сынып, IV тоқсан, 1 бөлім )

Пән: Қазақ тілі
Ұзақ мерзімді жоспар бөлімі: Қазақстандағы ұлттар достастығы.
Сабақтың тақырыбы: Ел бірлігі – ел бақыты
Жүзеге асатын оқу мақсаттары: А5. Берілген сұрақты дұрыс түсініп, лайықты жауап беру, шағын диалогке қатысу.
ТБ1.5 Болымды, болымсыз етістіктерді ауызша және жазба жұмыстарда орынды қолдану.
Сабақтың мақсаты: Барлық оқушылар: Өз ойларын айтады,болымды етістіктердің қолданысын біледі. Халықтар достастығы, ел бірлігі түсінігі қалыптасады.
Көптеген оқушылар: Өз ойларын еркін айтады, болымды, болымсыз етістіктерді ажырата алады.
Кейбір оқушылар: Өз ойын сенімді әрі еркін дәлел келтіріп айтады. Етістіктерді орынды қолданады.
Сабақ барысы: Қызығушылықты ояту,сергіту сәті. Оқушылар ортаға шығады. Олар бір-бірімен әр елдің тілінде амандасып шығады.
Суретке қарап сабақтың тақырыбын анықтайды.
Мұғалім оқушыларды оқу мақсатымен және бағалау критерийлерімен таныстырады
Сыныпты киіз үйдің бөліктері бойынша топқа бөлу. Шаңырақ,керег,уық,босаға.
1-тапсырма. Оқушыларға киіз үйдің бөліктері салынған суреттер беріледі,олар соның ішіне тапсырманы орындап жазу керек.
1-топ. Шаңырақ тобы.
- Қазақстанда тұратын халықтарды шаңырақтың ішіне тізіп жазып шығыңыздар.
2-топ.Уық тобы.
- Уыққа әр халықтың салт-дәстүрлерін жазып шығыңыздар.
3-топ. Кереге тобы.
- Керегеге әр халықтың ұлттық киімдерін жазыңыздар.
4-топ. Босаға тобы.
- Әр халықтың ұлттық тағамдарын жазып шығыңыздар.
Сұрақ-жауап.Диалогке түсу.
Мұғалім неге? деген сұрақ қою арқылы оқушыларды диалогке тартады. Оқушыларда сұраққа жауап беру арқылы ұлттар бірлігі, бір шаңырақ астында, әр ұлт ерекшілігі туралы түсінік қалыптасады.


Бағалау критерийі:
- Қазақстандағы ұлттар туралы біледі.
- Ұлттық ерекшеліктерді таниды.
- Ел бірлігі ұғымын түсінеді.
- Дәлел келтіріп айтады.
2-тапсырма. Жеке жұмыс. Болымды және болымсыз етістіктер. М.Мағауиннің «Бір атаның балалары» шығармасынан үзінді беріледі.
1. Үзіндіде қандай ой айтылған?
2. Қарамен берілген болымды етістіктерді болымсыз түріне айналдырып сөйлем құрастыру.
Сөздікпен жұмыс.
Нөсер- жауын-шашын, жаңбыр
Жайсаңдар- жақсылар, ізгілер
Мәуелі бақ- жеміске толы бақ
Тағыны тізгіндеді- асауды үйретті, жабайы жануарды үйретті
...- Неміс деп, орыс ,қазақ деп бөлу пайғамбарға шет, құдайға күнә,-деді Ахаң,- Жарықтық үлкен әкем айтушы еді,бұрынғы жайсаңдардан қалған сөз деп...- Қонышынан күміспен өрнектелген мүйіз шақшасын алып, алақанын толтыра насыбай атты, мұртын ширатып,сақалын салалап, сәл бөгелді:- Алдымен тиянақсыз көк аспан, содан соң тұрлаусыз қара жер жаратылды. Аспандағы ауа бұлтқа айналды, бұлттан жауған нөсермен иіген жерге жасыл шөп, гүл-бәйшешек, саялы дарақ, мәуелі жеміс шықты. Отты,суды далада, қалың жыныс орман ішінде неше түрлі жан-жануар ,хайуанат өсіп-өнді. Ең ақырында солардың бәріне иелік ету үшін адамзат келді дүниеге. Тағыны тізгіндеді, асауды бұғалықтады. Ол кезде ру аласы, ел таласы болған жоқ. Жұрт тегіс шат-шадымын тұрмыс шекті. Өйткені жер бетін қоныстанған алғашқы адамның барлығы бір атаның баласы еді.......