Доссорды мекендермін мәңгілікке

Қажеті жоқ Пантеон, Кеңсайың да,

Қауымымен бір жату жөн шайырға.

Өлгеннен соң Доссорға іздеп келсін,

Оқырман білем десе мен жайында.

 

Осында әжелерім, ағалар да,

Қанша жас қияды екен маған Алла.

Бір орын бұйырмай ма әрі кетсе,

Тоқсанға таяп қалған шамаларда.

 

Аңыз ғып айтпаса да атымды Алаш,

Басыма соғып кетер қатын-қалаш.

Топырағы нәр берген туған жерім,

Өзінен шыққан ұлын жатырқамас.

 

Қашан бұйрық келерін жан біліп пе,

Ақыры  болса жақсы мәнді нүкте.

Кезді деп шартарапты сөкпеңіздер,

Доссорды мекендермін мәңгілікке!

 

Есжан Асылбек

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇