Жақсы иттің атын - "Маймақ" деп қояды

● КТК телеарнасының кезекті жаңалықтар легінен хабардар бола отырып төмендегі көріністен аттап өте алмадым. Атауын - "Ақмола облысында 2 жасар бөбек итті құшақтап ұйықтап жатқан жерінен табылды" деп қойған екен. Кішкентайымнан ит атаулысына құмар өскенімнен болар, мен үшін бұл уақиға - интригага толы болды. Бір сәт аялдамастан ішіне жүгінгенім сол - жүрек тебірентер жауапқа кезіге кеттім..

● Ақмола облысының Бурабай ауданына қарасты елдімекендердің бірінде үй шаруасымен айналшықтап қалған анасы - 2 жасар Мәдина есімді қызынан көз жазып қалған көрінеді. Аталмыш жағдайда аянып қалмай, сабылып іздеген тәртіп сақшылары - Мәдинаны тек таңсәріге жақын тұста орман ішін күнелтіп жүретін бейбақ иттің қойнынан тапқан. Таң атқанша балаға қамқорлық қылған иесіз ит - тіпті қызды іздеп келген адамдарды да бірден жолатпағанын айтады. Ал төрт аяқты жануарды құшақтап, алаңсыз ұйықтаған Мәдинаның дені аман-сау. Көзсіз батырлығы мен жүрек елжіретер мейірімділігіне тәнті болған ата-анасы ойланбастан "ұрғашы" итті асырап алып, аздап ақсаңдап жүретініне байланысты есімін - "Маймақ" деп қойыпты.

● Бұл жануардың адам баласына мұншалықты адалдығы мен мейірімділігін ескере отырып халық аузындағы "Жаман иттің атын - Бөрібасар қояды" делінген мақалды жалғастырып : "Жақсы иттің атын - Маймақ қояды" дегім келді. Әр адам - өз кейіпкерін қойсын.)

© Сағым Матқали, дереккөзі