Мен өз елімде ғана бақыттымын!

Қазақстан - менің туған елім, менің сүйікті Отаным! «Отан — отбасынан басталады» деген халқымыз. Әрине, әр балаға Отаны болып өзінің отбасы, туған үйі саналады. Ал басқа әлем оған бөтен болып көрінеді ғой.

Екінші Отаным – ол менің туып-өскен қалам - Сәтбаев қаласы. Қазақтың ғұлама ғалымы Қаныш Имантайұлы Сәтбаевтың есімімен аталатын қалам өте таза, көркейген, жайқалған ең көрікті қалалардың бірі. Менің қалам әлемнің ең бір сұлу да, әрі бай жері деп ойлаймын. Айнала жасыл, әсем гүлзарларымен көз тартатын туған жерімде - Сарыарқаның ен даласында алтыннан төселген, жайлауында жасылдан төселген кілем жатыр.

Қаламыз күн санап көркейіп, жанданып, жаңарып жатыр. Жастардың бос уақытын тиімді пайдалануы үшін барлық жағдай жасалған. Спорттық-сауықтыру кешендері, түрлі үйірмелер, аула клубтары бізге әрқашан есігін айқара ашып, қызмет көрсетеді. Өзіміз өмір сүріп жатқан қаламыздың таза, жайқалып тұруына үлесімізді қосып, тазалық сенбіліктерінде бар күш-жігерімізді жұмсап, қаламыздың сәулетті, көрікті болуына атсалысамыз. Ұстаздарымыз әр сабақтарында әрбір азамат өз елінің патриоты болуы керектігін санамызға құйып келеді.

Менің қалам - 40 жылдық тарихы бар, шағын болса да, әдемі әсем қалалардың бірі. Қаламыз күннен-күнге алға жылжуда. Қала орталығы да, шеті де құрылыс үстінде. Саябақтарда ағаштар отырғызылып, жастар дем алатын орындар да жеткілікті. Қала көшелері үнемі тазарып, гүлзарлар күтулі, қарай берсең – көз тоймас, жаза берсең – сөз жетпейді. Әркімге өз туған қаласы бәрінен де көрікті, бәрінен де ыстық болып тұрады. Демалыс уақыттарында басқа қалаларға барып қыдырып қайтамыз, алайда өз қалам бәрінен де әдемі, әсем де көрікті қала!

Елбасымыз Нұрсұлтан Әбішұлы Назарбаев халыққа жолдаған әрбір Жолдауында Отанымызды, елімізді, жерімізді көркейтетін болашақ жастар, яғни біздер екенін баса айтады. Міне, Қазақстан дамып, өркендеу жолында. Мен де ертеңгі күні ер жетіп, алған жолымнан таймай, өз елімнің білімді азаматы болсам, сол елімнің өркендеуіне шамам келгенше елеулі үлесімді қоссам деймін.

Қайырымды болу керек, білемін,
Әжемнің берген ақылын ойға түйемін.
Немқұрайлық ешқашанда танытпай,
Оттан да ыстық Отанымды сүйемін.