Өлеңдер ✍️

Жан анам! Көп кешiкпей саған барам.
Жүректiң сыбырынан соны аңғарам.
Кетiп ең таң бозынан, талтүс болды,
Сағатты көрсетедi санам маған.
Жан анам! Жайың бар-ау алаңдаған,
Сəл мезет көз жазып қап, таба алмаған.
Фəниден шығатын жол бiреу ғана,
Жаныңа адаспастан барар балаң.
Жан анам! Көп кешiкпей саған барам.
Мен неге саған бармай, сараңданам.
Болғанмен дүние шексiз, ғұмыр қысқа,
Тағдырын ешкiм таңдап ала алмаған.
Жан анам! Күн сипатты аяулы анам!
Өзiңмен қауышар күн таяу маған.
Бақидың шексiз жолын басып өтiп,
Мəңгiлiк мекенiңе жаяу барам.
Аяулы анам!