Өлеңдер ✍️

Мынау жанар неге мұнша бұйығы?
Неткен тылсым тұма-көздiң ұйығы.
Бұлт бүркеген Күндей күңгiрт тартады
Түсе қалса бөгде көздiң қиығы.
Мынау жанар неге мұнша бұйығы?
Шалды ма əлде бiр сайқалдың құйыны.
Бəз баяғы қалпыңа көш, таусылма,
Пəк сезiмнiң болмайды ұшы-қиыры.
Қалқам, неге iштен тынып жылайсың?
Басқа – саған, сен басқаға ұнайсың.
Сенi аңсаған бiр жүрек бар, күмəнсiз,
Түбiнде бiр кең құшаққа құлайсың.
Жүрек шiркiн өктемдiкке көнер ме,
Сезiм – бiр сел, серпiп соғар кемерге.
Емес күнə – жүз бiр рет сүю де,
Махаббаттың жүз таяғын жегенге...