Өлеңдер ✍️

Күн шыжғырып төбемізден,
Құмның лебі беттен өбер.
Қашқан жандай тегі бізден,
Асау толқын жөңкіп берер.
Сусындаттың паң даланы,
Ну тоғайға бөленді өлкем.
Қарағанда көз талады,
Жағаңда тұр үйлер көркем.
Құмдағыңа аунай берем,
Еркін жүзіп айдыныңда.
Мұнда кілең қайсар өрен,
Тартып туған айбыныңа.
Сенің майлы топырағың,
Мен үшін бір алтын кесек.
Жағаңда өскен жапырағың,
Аунағанда жұмсақ төсек.
Ақ жүзімді аймалайды,
Жібек самал желпіп күнде.
Көктен күліп Ай қарайды,
Серуендесем тымық түнде.