Өлеңдер ✍️

Қаланың аруларының
Жымыңдаған күлім көздеріндей,
Менің бауырларымның
Жүректегі жылы сөздеріндей.
Түнімен жайнап тұрар,
Жұлдыздармен жайнап тұрар
Алматы оттары.
Ымдасып көктегі Аймен,
Нұр шашып гүлзарларға,
Сырласып көп тоғаймен,
Қол созған құзарларға.
Бір сөніп, бір жанатын,
Қарасаң, көз талатын
Алматы оттары.
Моншақтай тізілген бір,
Шұғылалы нұрлы шамдар.
Жайнаған үзілген гүл,
От болып атар таңдар.
О, алтын алқалардай,
Күлімкөз қалқалардай
Алматы оттары.