Өлеңдер ✍️

Азаяды-ау, жас ұлғайып, мәз күнім,
Бір иығын күзге аударды жаз бүгін.
Тамыршыдай, таразы уақыт өлшеді,
Адамдар көп, адал достың аздығын.
Аспан мынау шәйі көрпе бүркенген,
Ақбас шыңға, ақбура бұлт сүйкенген.
Түн етегін қымтап алып қашқанда,
Қол бұлғаған сені көрем үркерден.
Самал желге тербеледі тобылғы,
Таң асырдым көңіл деген торымды.
Аллам көкте, сен асқақтау болған соң,
Аспан жаққа созып тұрмын қолымды...