Өлеңдер ✍️

Деймісің бұл ағаңа
– Қалың қалай?
Жіліктеп айтам, жаным, бəрін қалай,
Алысар ауыздықпен асау күн жоқ –
Тартамыз тағдыр жүгін арындамай.
Көтеріп, қошеметтеп қос ағасын,
Жүреміз арыннан қол босағасын.
Шал болып шау тартқан бұл шағымызда
Күзетіп ұйғыр, корей босағасын.
Қазақтың қара шаңырақ Одағы еді,
Арнасы арманымның толы-ақ еді.
Басқаға барымыздың бəрін беріп,
Өзіміз сырт қалмасақ болар еді.
Күйбің-күйбің көңілге күй келмеген,
Ашиды тұз басқандай күйген денем.
Төрдегі басымызды доп қып ойнап,
Келеміз есік жаққа сүйреуменен.
Көңіл шерден, бас ойдан босағасын –
Жақсы, жаман... бəрін де хош аласың.
Өзім де ұқпай, өзгеге де ұқтыра алмай,
Келемін түсіне алмай осы арасын.
Қапы жоқ басшылықтың шешімінде,
Тілімнің тартып жүрмін кесірін де.
Құрметті демалысқа кетер ме екем
Отырып əркімдердің есігінде