Өлеңдер ✍️

Ауылымның сыртында жалғыз бұлақ,
Тұнығына бас қояр жалбыз құлап.
Шілде-жазда салқындап күллі тірлік,
Қолы жетпей тұратын андыз жылап.
Сыңғырлаған үніне құлақ түріп,
Би билейтін гүл біткен... жылап тұрып,
Әуенімен келгендей ән салғысы
Танытатын еркелеп құрақ қылық.
Терең мұңмен астасып сыңғыр үні,
Тұнығына тұншыққан сыр дүбірі.
Түн құшағын ашқанда жылайтын ол
Нәзік жанын ауыртып гүл-ғұмыры.
Көрінетін бұл өмір сәл мұңдылау,
Уысында бұлқынтқан тағдыр мынау.
Асығады ол арналы ағындарға,
Жалғыздық-ай! Жанына салдың бұрау.
...Қыс келді де, арнасын мұз құрсады,
Қара жерден қайыр жоқ сыз құрсағы.

Тым-тырыс боп бұлағым тілсіз жатыр,
Сөйлер ме екен сынғанда мұздың сағы...

1993 жыл