Өлеңдер ✍️

Төменнен төске шауып өрлегендер,
Армандарын келмеске көмген ерлер...
Ғазауаттың отына қарылғандар,
Жалын жандар... Өртеніп, өлмегендер.
От ішінде өртеніп, өлмегендер,
Су ішінде сусырап шөлдегендер,
Тар тамұқта тозаққа қарылғандар,
Жалын жандар –
Тұншығып, сөнбегендер.
Мəңгі тірі өшпеген рухтарың,
Сахнасына тарихтың шығып бəрің
Ұрпақпенен қауышып-табыстыңдар,
Талқан қылып тамұқтың құлыптарын.
Жалындатып жылдардың таңғы алауын,
Жастай күйіп-жандыңдар, таң қаламын.
Ұрпақтарың ертеңмен жалғастырады
Сендер айтпай қалдырған арман əнін.
Өлмегендер, алаулап сөнбегендер,
Су ішінде сусырап шөлдегендер!
Аңыз қылып жалғайды ғасырларға
Сендерді көрген елдер,
Қиындыққа сендердей көнген ерлер.