Өлеңдер ✍️

Тұяғы кем кәрі аттаймын

Тастақ жерді жаратпаймын...
Құмда ойнаған баладай-ақ

Жүргім келеді жалаңаяқ...
Көсік-жуа дәмін алып,
Құмаршықтың дәнін алып,
Батпалармен* жымыңдасып,
Сары селеумен сыбырласып,
Ата-бабам ізін басып,
Туған жердің құмын басып

Тұщықұдық барғым келді,
Құшағыма алғым келді!..
Бұл мекенде – жалындаған
Қарт Сәттіғұл дамылдаған...
Ізтұрғаным*- қақпан белім,
Мамық болсын жатқан жерің!..
Ұясынан шетте жүрген,
Қартайғанша текке жүрген,
Сені іздеген балаң едім

Денсаулыққа алаң едім...
Сынық мүйіз серкедейін

Сүйкенейін, еркелейін!..
Алтын құмға үйір күнім,
Оралсаңшы, құйын – күнім!..
Шығарсаңшы «күшті» қылып,
Өзің емде, Тұщықұдық!..