Өлеңдер ✍️

Қыз-жүрек менде намыспен өртеп жүздерін,
Қызғанам сені жұтсаң сен өзге қыз демін,
Нанбайды жүрек. Нанса да қайта жақтайды,
Алғашқы сезім сәулесін мәңгі сақтайды.
...Ұшырдым ойдан қиялдың тырна-тізбегін:
Мүмкін бе сенің бақ жолымды үзбегің?!
Неліктен алыс жалғасқан жолдар арманға?
Неліктен шалыс тағдыр-мәрт мына жалғанда?
Бықсығын жағып, маздатар кейбір шаланы,
От-жалын неге түтіндеп кейде қалады?
Жарықтың жолын көлеңке неге шалады?!
Шақырса жастық «Ақсүйек», «Алтыбақанда»,
Алданба, менің жүрегім, әсті алданба!
Қыз-жүрек шашқан пәк нұрдан әлем шырайлы,
Тірлікке тамшы мөлдірлік қана сұрайды,
Аққудай егіз жансерік берсін ақ таңда,
Қалғыма, жүрек, арманды сол таң атқанда!
Қонбайды бақыт ұят пен ұя сатқанға!
...Қыз-жүрек солай тірліктің кілтін бұрайды,
Қыз-тілек қана нұрлы етер Жер мен Күн –Айды!