Өлеңдер ✍️

Өсімдікке төндіретін кіл қауіп,
Денесіне оратылған шырмауық
Шайтанды еске салады.
Тірлік үшін таусылмайтын қырқыста
Бірін бірі шайнап жеген жыртқыш та
Шайтанды еске салады.
Өлексені шоқып жатқан құзғын да,
Дегендей-ақ: «Көрмейсің бе, біз мұнда!» –
Шайтанды еске салады.
Айдалада күн өткізген секектеп,
Жұмыртқасын тастай қашқан көкек те
Шайтанды еске салады.
Еркектердің ақыл-есін жаулаған,
Сұлулар да төсегінде аунаған
Шайтанды еске салады.
Ислам дінін шайтан жібі шырмаса,
Бұл дүния бір қалыпта тұрмаса,
Кімге болар обалы?!